Carito Lapau, Episode 3 : SUMBAR UNGGUL

Si Maih baliho sadang sanang. Proyek Pilkada rami nan tibo. Baliho, bilboard, baju kaos, pernak-pernik calon, sagalo macam, ndak bapantang disikatnyo dek Si maih. Dek itu Maih Baliho beliau dipanggia urang sakecamatan.

Si Maih baru salasai pasang bilboard ciek untuak calon pasangan C di simpang, lalu si maih singgah ka kadai Uni Piak Dongak, di tapi Batang Kulitan. Taragak bakwan jo kopi ni piak.

"Assalamualaikum, Uni!!!", sapo Si Maih, badantang bunyinyo

"Eh waalaikumsalam. Waang Maih, Kalera takajuik den dek ang", jawek Ni Piak

"Haha.. Iyo ni, taragak ambo jo bakwan uni"

Si Buyuang Mada sadang mancigok-cigok facebook di hpnyo, sato pulo ikuik

"Eh yayai, makin buncik paruik ang Maih. Sabana kanyang dek Pilkada ko mah yo", semba Si Buyuang Mada

"Alhamdulilah Yuang, lai juo manggatuih-gatuih. Nan pantiang berkelanjutan. Haha. Kan iko lo ko"

"Lah pakai kato berkelanjutan pulo angku kini, alah model politisi laweh muncuang pulo"

"Awak maniru-niru sajo, bia keren pulo nampaknyo. Kopi nan kaiyo ko nyo, uni. Mintak lah mbo satangah", kato si Maih

"Haa jadih, Maih", jawek Uni Piak

"Jadi giko ko ni, yuang", si Maih mulai mambuka carito baru

"Ambo sadang mangarajoan Alat peraga Calon Pasangan C koa. Tadi abis masang Bilboard tangguang di Simpang. Iko ado kalendernyo. Kalo uni jo si buyuang amuah, ambo sisiahkan dua", lanjuik si Maih

"Sabana rami proyek si Maih kini. Manyo kalender tu", jawek si Buyuang

"Konyo!! "

"Hoooi mandeh, Calon pasangan C. Mottonyo "SUMBAR UNGGUL". Apo mukasuiknyo ko Maih"

"Ndak mangarati pulo ambo, yuang. Ambo dibayia untuk mangarajaon Alat Peraga tu sajo. Ndak mangarati bagai ndak anti. Hahhaha"

"Hahhaa. Kacau ang mah, Maih. Dek Kato Unggul ko, takana bibit unggul dek wak. Bibit Padi Unggul, Bibit Jaguang unggul, Bibit Ikan Unggul. Hahaha"

"Ndeh, kalo sekedar bibit unggul sajo. Haaa ancak apak tu jadi Kapalo Dinas Pertanian di siko ko lai. Manga lo mancalon Wakil Gubernur bagai. Atau kalo indak, Calon Gubernurnyo tu labiah rancak jadi Kapalo Dinas Perikanan di Kampuangnyo tu. Bia nyo sebar bibit lauk unggul banyak-banyak di tang aia kampuangnyoa tu, kan", Uni Upiak langsuang menyemba sahabis dari dapua mambuek kopi

"Ha tulah Uni, main semba-semba sajo. Ndak paham pangkanyo", baleh di Buyuang Mada

"Paham den. Tadanga dek den ota kalian dari bulakang soal bibit unggul tu nyo"

"Hahaha. Iyo pulo ni. Kalo memang maksuiknyo takah bibit unggul tu, iyo rancak lah jadi kepala dinas se apak baduo tu mah ndak", si Maih lah sato pulo baliak

"Tapi salain bibit unggul ko maih, ambo ingek pulo waktu SMP SMA dulu. Ado kalaih unggul. Dulu nan pandai-pandai, masuak kalaih unggul. Jadi dulu waktu SMP, kami ado 6 lokal saangkatan. Salokal kalaih unggul, limo lae indak. Nan kalaih unggul tu, pas kalaeh tigo diterapanyo. Diambiak dari nan juara satu sampai rangkig limo atau rangking anam, kalau den ndak salah", kato si buyuang, manyampaikan isi kapalonyo

"Mah Kalender tu baliak, den cabiak an. Pinjam sakalian pato, uni. Den rabahan baliak bilboard apak tu", si Maih mandadak naik pitam, sambiang tagak pinggang

"Aaaa dek aaa waang Maih. Basaba. Basaba setek. Apo masalahnyo?", si buyuang mananangan si Maih

"Batanang Maih. Minum lah kopi ko dulu. Itu bakwan masih angek pulo, lasau lah", uni Piak lah cameh pulo, sato pulo mananangan

"Jadi kalau kato Unggul apaktu takah Kelas Unggul waang dulu Yuang, iyo ndak tarimo den. Waang pun harusnyo berang yuang, aden jo waang samo sajo, ndak masuak lokal unggul. Kalo Sumbar ko untuak nan unggul-unggul macam tu, dicurinative namonyo tu, mirip aliran sosis di Jerman dulu tu mah. Babayo tu yuang", si Maih manjalehan, mukonyo merah, ai ludahnyo nan ketek-ketek malantiang-lantiang

"Maih, ndak dicurinative doh, diskriminatif. Ciek lai, ndak sosis doh, tapi rasis", si buyuang maluruihan istilah simaih

"Iyo, itu mukasuik mbo. Memang itu nan mbo sabuik tadi mah. Waang salah danga", si Maih mambela diri

"Jadi malah", jawek si buyuang

"Jan main rabo sajo Maih. Alun tantu mantun lai mukasuiknyo. Gakti ambo, inyo ingin mambuek Sumbar ko Unggul, bukan hanya bakarajo untuak kalangan nan lah unggul, misal kalangan nan lah unggul pitihe, unggul otoe, unggul tanahe, sagalo unggul, tapi juo untuk man alun unggul bia jadi unggul", Uni Piak Dongak mananangan si Maih, sambiang maagiah alternatif lain

"Unggul takah ma mukasuiknyo ni. Untuak mambuek Sumbar Unggul, tantu inyo akan maagiah prioritas ka nan lah unggul-unggul tu, mirip lokal unggul si Maih tadi", si Maih mambela pandapeknyo

"Iyo juo. Misal di tingkek nasional, tantu nan unggul-unggul dibaonyo. Nan indak unggul, anti lah dulu. Tapi indak harus mantun pulo maih. Bisa juo inyo maksudnyo untuk mambuek nan alun unggul jadi unggul. Iyo kan"

"Bisa jadi juo ni. Tapi memang agak tadanga kurang lasuah ditalingo wak istila unggul ko. Agak chauvistik tadanga", si buyuang ikuik pulo manambah suduik pandang

"Chauvinistik ko apo ko yuang, lai ndak sunbarang sabuik ang", jawek ni Piak. Diangguak an pulo dek si Maih

"Semacam raso kedaerahan awak balabiah dibandiang daerah lain, maraso daerah wak labiah unggul dari nan lain. Buruak ujuangnyo. Acok maremehan urang dari daerah lain awak beko. Acok batangka jadinyo", kato si Buyuang Mada

"Ooo mantun. Dapek istilah baru pulo ambo", jawek si Maih Baliho

"Tapi tanyo mbo ciek", Kato uni Piak

"Apo tu, ni", jawek si Buyuang

"Apak tu memangnyo sia, hebaek bananyo bisa mambuek nan indak unggul jadi unggul, atau hebaek bananyo maraso Sumbar ko nyo buek Unggul? Apo keunggulan apak-apak tu?"

"Nan ciek lah pernah duo kali jadi Bupati sakali jadi Wakil Gubernur ni. Nan ciek lai, duo kali jadi Bupati disiko. Selalu unggulnyo dalam pemilihan", jawek si Maih Baliho

"Ooo yo batea tu. Ambo sangko apak-apak ko sukses mambuek rakyeknyo unggul sabalum-sabalumnyo. Kalau hanyo sukses jadi bupati dan wakil gubernur nyeh, itu cacak di ateh kapalo ang sukses pulo jadi cacak sajak lahia. Kapuyuak di bawah barusi waang tu sukses pulo jadi kapuyuak sajak lahia, ndak paralu pakai pemilihan bagai doh", jawek uni Piak, agak tarabo pulo bantuaknyo

"Iyo juo kato Uni", jawek si Buyuang

"Baiko se lah ni, kalo uni ndak namuah Kalender ko ndak baa. Ambo bao se baliak", kato si Maih Baliho

"Iyo, ndak usah lah. Alah banyak bana kalender di siko. Uni pakai kalender dari musajik Sungkai sajolah", jawek ni piak

"Ambo mantun pulo Maih. Alah cukuik kalender dari toko ameh pasa baru se lah di rumah Ambo", kato si Buyuang

"Jadih. Ambo permisi lah dulu. Ambo bao kalender ko baliak. Pitih kopi di dakek galaeh yo ni. Ambo permisi. Assalamualaikum"

"Waalaikumsalam", jawek ni piak sarantak jo si buyuang mada

Suasano agak langang sahabis si Maih Baliho pai. Uni Piak duduak se di bangku dakek si Maih duduak tadi. Si Buyuang tahanok pulo di bangkunyo. Antah apo nan ado di kapalonyo. Antah manyasa ndak masuak lokal unggul dulu antah baa. Tapi ndak lamo abis itu, uni piak samo si buyuang mada samo-samo mancaliak ado nan hanyuk di Batang Kulitan.

"Apo tu yuang", tanyo ni piak

"Antah ni. Sadang bacaliak jaleh ko. Oh itu bantuak kalender tadi nan dek si maih mah ni. Duo pulo nampaknya pas", kato si buyuang

"Oh iyo mah yuang. Alah dibuangnyo pulo dek si maih. Cubo ang caliak ka simpang, kok di bakanyo bilboard nan nyo pasang tu ndak", kato Ni piak

"Biaselah ni. Ndak urusan awak tu doh", baleh si Buyuang

"Iyo pulo yo"

 

Karya : Ronny P Sasmita