Carito Lapau, Episode 1 : BASAMO MEMBANGUN SUMBAR MADANI

"Madani ko apo ko yuang", tanyo Ni Piak Dongak, panggaleh bakwan di tapi batang aie Tangkulitan Manggopoh, ka si Buyuang Mada, tukang kaluaan kasiak.

"Antahlah ni, lai pulo nampak dek ambo Calon Bupati mamakai kato Madani ko, antah apo artinyo. Nan tau wak Padang Mardani nyo, sasudah sago arah Pasaman", jawek Buyuang Mada, sasuko atie

"Aaa tulah Yuang. Antahlah, biaselah, ndak jaleh apo mukasuik urang-urang ko apo doh. Takah mangecek ka dindiang urang-urang tu mah", baleh Uni Piak Dongak

"Satuju, ni. Baru ka mulai baru, alah ndak paham awak. Apolagi nanti kalo jadi, dikaluaanyo beko bahaso planet. Awak ndak paham, nan kepeang APBD susuik juo", jawek si Buyuang Mada

"Tantu pulo dek angku APBD bagai yo yuang. Apo APBD tu tu? ", si Uni Piak mambaliak an ka si Buyuang

"Intinyo soal pitih daerah ni. Antah apo lo kapanjangannyo. Ambo lai tau, hanyo sajo ambo lupo kapanjanganyo"

"Nyo lupo, tapi nyo tau. Jan ang puta-puta lo barang tu, yuang. Waang nan kapaniang. Indak tau se jawek, beres urusan. Intinyo urusan pitih rakyaek, pitih kito nan di pamerintah kan"

"Iyo itu bana. Nan pantiang uni paham, itu dulu cukuik. Intinyo kan itu"

"Itu apo ko? "

"Iyo itu"

"Tu kan. Ang puta-puta barang tu. Baa ndak ka paniang"

"Hahaha"

Sadang baputa-puta carito baduo, si Udin Lauk tibo

"Assalamualaikum", kato si Udin, maucap salam

"Nan pantiang salam. Pakaro sumbayang atau indak, itu lain pulo", si Udin Lauak manambahan

"Waalaikumsalam", jawek Uni Piak jo si Buyuang

"Kalera ang ko. Salam yo salam se lah. Ndak usah batambah pulo kicau murai tu", Uni Piak langsuang menyemba umpan si Udin

"Ha.. Iyo ni. Awak kan ka malucu tadi rencana. Nan ado kanai lasek dek uni", jawek si Udin Lauak

"Batua uni tu Din. Salam ko wajib untuak awak nan muslim. Nan sumbayang labiah wajib pulo untuak nan muslim. Duo hal tu. Kok sumbayang atau indak bagai waang, nan salam waang kami jawek", baleh si Buyuang Mada, manyemba pulo

"Iyo iyo. Alah tu. Aden salah mangomel. Nan jaleh, kok indak sumbayang bana, jan cubo-cubo manyabuik kapiau, jan cubo-cubo!! Manggemai kada namonyo tu. Etongannyo bisa panjang", jawek si Udin Lauak

"Ha ha ha. Bato baitu bana. Sia pulo ka manyabuik Udin Lauak Kapia, ndak ado nan barani doh. Walaupun si Udin ko memang sarik bana diajak sumbayang", kato ni Piak Dongak

"Jan buka-buka coki ni", jawek si Udin

"Jadi apo carito tadi, pakai madani-madani bagai tadanga tadi?", si Udin maalihan topik ka carito samulo

"Itu, pasangan Calon A, nan motonyo Basamo Membangun Sumbar Madani", jawek si Buyuang Mada

"Apo artinyo tu Yuang, Ni? Acok tadanga tapi ndak paham ambo. Acok dijua-jua politisi, alah macam iklan indomie. Tapi tetap awak ndak paham", kato si Udin Lauak

"Alah tu din. Ambo alah tutuik buku jo si Buyuang soal madani tu. Angkek tangan sabeleh jo kapalo, kami indak paham. Jadi kito lompekan sajo ka batang aie Tangkulitan", baleh Ni Piak Dongak

"Jadi malah. Tapi Calon A ko dulu waktu katapiliah jadi Walikota, manyabuik indak ka mancalon jadi Gubernur. Baa kini nyo malah sumangaik bana?", tanyo si Udin Lauak

"Iyo bana mantun, Din?", Ni Piak Dongak malah babaliak batanyo

"Ambo batanyo ka Uni, Uni pulo nan batanyo", baleh si Udin

"Iyo, memang takah tu, Din, Ni. Dulu inyo bajanji ka manyalasaian masa tugasnyo sebagai Walikota", si Buyuang mambana an pertanyaan si Udin

"Tu bantuaknyo. Alun apo-apo alah ingkar pulo beliau. Alah tadi gara-gara madani mambuek awak sakik utak. Kini malah awak jadi sakik ati", baleh Uni Piak

"Sakik ati baa pulo uni ko", tanyo si Udin

"Urang kalo kanai kicuah, rato-rato sakik ati. Lai paham waang", kato Uni Piak, agak judes

"Ah biaso sajo itu. Dulu peresiden nan kini ko takah itu juo. Indak salasai jadi gubernur, baru duo tahun, alah mancalon peresiden", kato si Buyuang Mada

"Dek sesamo politisi mungkin biaso. Dek sasamo pangicuah. Tapi takana dek den, apak Calon A ko kan Partainyo balawanan jo Partai Peresiden tu. Baa pulo bisa samo kalakuannyo? ", kato si Udin Lauak

"Memang babeda mereka baduo. Beda pertamu, nan ciek peresiden, man ciek walikota calon gubernur. Beda kaduo, Partainyo indak samo", baleh si Buyuang Mada

"Hahaha. Waang mambela atau baa ko Yuang", jawek ni Piak Dongak

"Indak. Manga urang mangicuah ka wak bela. Urang jujur dan bana nan kawak bela"

"Tu baa mantun jawek waang tadi? "

"Ambo ndak mambela. Tapi ambo memaklumi"

"Memaklumi apo? Bajaleh-jaleh lah"

"Ambo memaklumi bahwa apak Calon A tu memang samo sajo samo politisi nan lain. Ndak babeda. Hahaha"

"Alah baputa-puta pulo waang. Paniang den", baleh Ni Piak

"Kalo ambo baco di koran cabiak, alasan apak tu bahwa itu adalah keinginan Partainyo, makonyo inyo maju", kato si Buyuang Mada

"Batambah jauah mah, Yuang. Sebagai calon, inyo harus mandanga keinginan masyarakaek. Baa pulo patuah ka Partai", Uni Piak manjawek, agak naiak spaningnyo

"Tu lah dek uni. Alah ikar janji, kini Partai pulo nan nyo salahan. Partai Kambiang Itam lah jadinyo namonyo", semba di Udin Lauak

"Hahahaha", si Buyuang jo Uni Piak sarantak galak

"Tapi ado nan agak menarik setek dari pasangan A ko Ni, Yuang", kato si Udin, manabahan bahan

"Apo tu gakti?", tanyo si Buyuang

"Calon wakilnyo sabana Mudo"

"Mudo baa makasuiknyo? "

"Umuanyo mudo, baru 30an tahun"

"Yo bana? Manarik juo tu. Kok bisa baitu, dima dapek dek nyo? "

"Itu, memang mudo. Salain itu, inyo kayo. Paliang kayo di antara lapan urang nan maju"

"Inyo mudo, inyo pulo nan paliang kayo, mantun kan mukasuik ang, Din?"

"Iyo"

"Kalo baitu, ambo pakai teori "Maklum" pulo baliak. Kato anak gaul Jakartanyo, "Oh pantesss", kato so Buyuang

"Ambo kamanyabuik itu pulo tadi tu", kato Ni Piak manambahan

"Lai ndak kadikicuahnyo pulo paja nan mudo jo kayo ko dek apak nan mangicuah tadi tu tu", si Udin manambah angek situasi

"Haaaa.. Antahlah kalo mantun", jawek si Buyuang

"Nan ambo tau, apak tu pandiam. Acok anok pado maota. Mungkin nyo takuik bagunjiang, takuik badoso. Padahal kalo jadi pejabat ko harus banyak mangecek, banyak manjalehan ka masyarakat, tentang berbagai hal nan dikarajaon pemerintahanyo kan?", kato Uni Piak

"Iyo pahanok. Sakali mangecek, inyo ingkari pulo", jawek si Udin, manambah angek pembicaraan

"Hahahaha. Diam-diam memghanyutkan bana mah yo", si Buyuang Mada sato pulo galak

"Alah tu. Tadanga deknyo beko ndak ditambahnyo proyek untuak Si Maih Baliho. Awak nan kanai salah", kato Uni Piak

"Tapi nan calon wakil A ko kasalasai S3 kabanyo, calon Doktor. Kandidat Doktor istilahe di balihonyo tatulih", kato si Buyuang Mada

"Ndak mangarati den, doktor dokter dokar dolar dodol, nan Madani ko jalehan lah ka rakyaek. Percuma se doktar doktor kalo mangecek urang ndak mangarati", kato si Udin Lauak

"Jan kareh bana, Din. Ingek si Maih ndak dapek proyek beko", kato Uni Piak

"Hahahhaha. Kadang-kadang tabao esmosi ambo", jawek si Udin Lauak

"Emosi", kato si Buyuang Mada maluruihan

"Nah, itu", baleh si Udin, sambiang manunjuak ka si Buyuang Mada

"Haaaaa alah tuh, paniang den. Sakik utak den. Ndak usah mengecek politik se lai. Alah tu. Waang ka pasan kopi atau indak Din, kalo indak, minum se lah dek ang kato Madani tu", kato Uni Piak, alah mulai berang nampaknyo

"Tu lah ini. Basaba ni. Iyo ambo pasan kopi. Untuak apo pulo dek ambo madani-madani tu tu. Paham se indak", jawek si Udin

"Main domino batu 14 se kito Din, daripado mauruih Madani, eh mauruih politik", kato si Buyuang

"Ha jadih. Masuak tu"

Uni piak alah ka balakang, mambuek kopi. Samantaro, bagi si Udin Lauak jo si Buyuang Mada, Domino masih labiah menarik daripado bahaso politik yang malangik.

Karya : Ronny P Sasmita