Upiak Dongak, Episode 4 : PEMIMPIN PERUBAHAN

Agak kurang lamak badan si Udin Lauak nampaknyo. Hari kini ndak manyilam ka lubuaknyo doh. Nampak malenggang tagak se ka arah kadai Uni Piak Dongak, ndak ado mambao badia lauak jo kacomato manyilam bagai.

Di jalan tasobok jo Apak Midi, pensiunan Kapalo Sikola SMP di Tiku, acok dipanggia: Pak Midi Kapalo sajo, samo anaknyo nan nomor tigo, si Anto. Dek kuliah di jurusan Pendidikan Matematik di UNP Padang, jadi acok dipanggia Anto Matik se lai.

"Hoi Udin, kama agak, batangan kosong sajo", sapo Pak Midi Kapalo

"Hayoihh, sadang maleh mancilam kini, Da. Sadang kurang lamak badan. Ko ka kadai tapi aie rencana. Paralu diagiah soda susu di kandai Uni Piak Dongak nampaknyo", jawek si Udin

"Ado Anto Matik pulo mah, anak kesayangan Papa Kapalo. Sadang libur?", si Udin manambah bahan

"Iyo, Da. Sadang libur", kato si Anto matik

"Uda kiro tadi mambao gariang sajarek, lah lamo ndak manyamba gariang uni waang di rumah", tanyo Pak Midi Kapalo

"Sadang indak da. Dua hari lai lah, ambo antaan ka rumah. Rancak kito maota sambuang minum di kadai tapi aie da. Baa gakti uda"

"Ha buliah.. Buliah. Masuak juo tu. Lah lamo indak. Nah Nto, antaan papa"

Alah melesat pulo inyo batigo ka arah tapi aie. Nan Uni Piak Dongak sadang bagalak-galak samo si Buyuang Mada jo si Maih Baliho di kadai.

"Jadi proyek dari Pasangan C tu lai tetap lanjut kan Maih", tanyo si Buyuang Mada

"Lai. Manyasa ambo mambuang kalender kapatang. Kurang jadinyo untuak dibagikan di mudiak. Talalu baper bana awak. Hahaha"

"Tulah waang, capek ka marabo se", baleh Ni Piak Dongak

Sadang maota tagak, nan batigo tadi sampai di kadai.

"Eh yayai, alah disiko sadonyo. Asalamualaikum lah ciek", semba si Udin

"Waalaikumsalam", hampia sarantak katigonyo manjawek

"Haaa... Baa bakosong tangan ang Din. Ndak ka mancilam hari kini", tanyo so Maih Baliho

"Indak, Maih. Sadang domam bantuaknyo badan den"

"Hoo ado Apak Kapalo ruponyo alah lamo indak mangopi di siko. Baa kaba Uda, lai sehat? Ado si Anto matik bagai, bakawanan bana papa tu kama-kamanyo yo", Uni nan pernah naksir ka Pak Midi di zaman dulu, langsuang agak genit saketek, manyapo Pak Midi Kapalo.

"Alhamdulillah sehat, Piak. Upiak lai sehat kan? Makin bakilek sajo nampak dek uda, sajak lah tingga sorang ko", Pak Midi Kapalo ndak pulo amuah kalah. Basingajo pulo manggili jando kawan lamo inyo, nan lah maningga dua tahun lalu

"Dek doa uda juo, alhamdulillah sehat, da", jaweb Uni Piak sambiang maegang-egang untai kerudungnyo. Antah grogi antah baa

"Syukurlah kalo mantun. Sanang uda mandanga"

Si Anto matik langsuang tumbuah tanduak duo di kapalonyo mancaliak papanyo mulai maleper. Matonyo nyalang, mancaliak langsuang ka muko Pak Midi. Pak Midi kapalo langsuang konek, langsuang batanang mancari tampek duduak. Abis tu maalihan isu

"Jadi pasangan nan nama sajo nan angku karajoan alat peraganyo, Maih. Tadi tadanga Pasangan C dek ambo?", Kacek Pak Midi Kapalo, maalihan isu

"Pasangan A lai dapek mangarajoan baju da, pasanga B dapek Baliho jo Stiker. Nan Pasangan C, dapek bilboard ukuran sadang samo kalender. Alhamdulillah. Lah baganti hp anak ambo jo android nan baru, sunsang nan dari Korea. Lah sibuk TikTokan pulo liau. Nan bini tiok sabanta sabana mandakek taruih kini"

"Hahaha. Alhamdulillah, Maih. Takana dek den, baa kok Pasangan D indak basabuik, atau indak dapek?", baleh Pak Midi Kapalo

"Nan Pasangan D ko nan mottonyo apo ko, da", si Buyuang manyemba tagak

"Apo mottonyo, Maih", dipajalehnyo dek Uni Piak pertanyaan si Buyuang

"Apo yo? Lupo-lupo ingek ambo", jawek si Maih

"PEMIMPIN PERUBAHAN", si Anto Matik manggatuih dari sampiang

"Nah, itu", baleh si Maih

"Pemimpin perubahan baa pulo dek apak tu tu", tanyo si buyuang

"Ambo baru sadar pulo. Mungkin dek Motto iko ko Uda Kapalo, makonnyo ambo alun dapek proyek dari pasangan D ko", semba si Maih Baliho

"Haha baa pulo caritonyo tu? ", tanyo Pak Midi Kapalo

"Dek kato perubahan itu nampaknyo. Awalnyo sempat ado nan mamintak wak mangarajoan. Lalu tibo-tibo malamnyo inyo suruah tahan dulu. Tu paginyo inyo minta batalkan pulo. Alah barubah-rubah se. Sampai kini alun jaleh ujuangnyo lae. Pas bana mah jo kato perubahan tu. Sabanta sajo barubah bisuaknyo", jawek si Maih, manjalehan suduik pandangnyo, mukonyo nampak agak berang-berang tangguang

"Apo tu Maih, nan batua lah. Hahaha. Tapi iyo lah, tasarah dek Maih. Ambo dari tadi kamamasan soda susu, alun juo tapasan. Soda susu lah ciek, ni", si Udin Lauak menyemba pulo

"Ambo iyo pulo, Kopi satangah untuak ambo. Teh Talua untuk anak Ambo nan mahasiswa ko", sambuang Pak Midi Kapalo

Nan lain lah tabao galak. Agak picayo juo jo teori si Maih Baliho nampaknyo. Samantaro Uni Piak bagageh ka bulakang manyiapkan Soda susu. Tibo-tibo, mahasiswa matematik UNP, gata tangannyo, dek disabuiknyo mahasiswa pulo dek papanyo, ingin sato pulo.

"Apak tu salah kalender mah kayaknyo", kato si Anto Matik

"Haaa. Salah kalender baa?", jawek si Buyuang Mada. Nan lain alah malongok lo ka si Anto Matik, penasaran

"Iyo, inyo sangko masih tahun 97/98 juo lae. Masih basorak perubahan. Awak ko butuah perbaikan, itu nan luruih dan tapek. Kalau perubahan ko alun pasti lai, bisa elok bisa pulo makin buruak. Tapi tetap namonyo perubahan. Bunyi-bunyi masih tahun 97/98 bunyinyo. Kini alah 2020. Itu makonyo ambo sabuik salah kalender", si Anto Matik majalehan teorinyo, mukonyo agak serius, bausaho bapaham, bia bangga papanyo

Nan mandanga sadonyo agak taangguak-angguak pulo saketek. Antaro mangarati jo indak.

"Jadi, salah kamar mah apak tu yo, Nto. Awak alah reformasi, alah 20 tahun labiah, nan soraknyo itu se baru. Kadaluarsa namonyo tu ndak", baleh si Buyuang Mada

Nan lain alah sato pulo manjawek lambek-lambek, agak maangguak-angguak

"Iyo iyo iyo iyo. Antah perubahan apo mukasuik beliau yo. Asa ka burabah sajo. Alah takah film kesukaan anak ambo mah da kapalo. Power Ranger. Asa ado lawannyo, nyo berubah", si Udin Lauk alah sato pulo baliak

Tagalak sadonyo.

"Alah macam bunglon tu", kato si Maih Baliho

"Indak itu sajo mah", Uni Piak Dongak baliak dari bulakang, sambiang bao soda susu jo kopi, alah menyemba pulo baliak

"Nan ambo heran pulo samo pasangan D ko. Nan lain mottonyo lai fokus ka Sumbar, eh inyo fokus ka dirinyo surang se. Pemimpin Perubahan. Nan calon pemimpin kan beliau. Aneh pulo, kato anak mudo, rasis bana", Uni Piak Manambahan

"Narsis mungkin Piak", Pak Midi Kapalo maluruihan

"Nah, itu mukasuik ambo da"

"Iyo pulo yo, urang sibuk menyoal Sumbar dek nan dicari pemimpin Sumbar. Nan inyo sibuk jo diri inyo. Pemimpin Perubahan. Tantu nan barubah inyo nanti tu ndak. Barubah tambah kayo, tambah banyak peangnyo, tanahnyo, sawitnyo, gedungnyo, mantun gakti ndak", si Maih manambahan

"Iyo, alah batua uni tu. Narsis namonyo. Dari mottonyo sajo alah nampak nan ditonjolannyo inyo sajo", si buyuang sato pulo manambah-nambah

"Ado ciek lai nan kurang pas setau ambo", kato si Anto Matik, masih ingin manunjuak an kemahasiswaannyo ka papanyo

"Ambo pernah nonton apak tu di tivi. Inyo sabuik giko. Sumbar tu indak punyo SDA doh, jadi pemimpin nantik harus nan mampu melobby Jakarta, bia dapek anggaran labiah banyak tiok tahun", kato si Anto. Wajahe nampak agak ongeh senek

"Lalu baa persoalannyo? ", tanyo si Buyuang Mada

"Jadi baiko. Dari dulu kan Sumbar memang takah tu. Anggaran dari pusat jauah labiah banyak daripado anggaran pendapatan asli daerah. Nah, kalo mantun tawaran apak tu, tantu status quo namonyo, bukan marubah. Malanjutkan sajo nan lamo. Harusnyo inyo menawarkan perubahan, dengan konsep kemandirian anggaran daerah, misalnyo. Bia ndak manjilek ka Jakarta", baleh si Anto Matik

Nan lain ikuik maangguak-angguak

"Jadi, istilahnyo, awak sadonyo ka diajak jadi penggemis ka Jakarta mah yo, nto? ", semba si Udin Lauk

"Kasanyo, mantun kiro-kiro da", jawek si Anto

"Ehem. Rancak juo analisa anak papa mah", Pak Midi icak-icak batuak, sambiang mamuji anaknyo. Lalu maalihan topik, takuik anaknyo talongsong. Maklum mahasiswa kadang-kadang agak kareh setelannyo.

"Alah tu lai. Ndak ka beres maota politik doh. Ancak maota nan lain kito. Atau badomino sajo. Alah lamo indak", kato Pak Midi Kapalo, malanjuikan

"Jadi malah", jawek si Buyuang Mada. Nan lain sato pulo maangguak

Abis tu, si buyuang langsuang buka hp baliak. Takan menu, piliah ikon Facebook. Alah siap-siap nulis status

"Hoi sadonyo. Kok bisuak ka mancucuak pasangan D, ado syaratnyo. Nan partamu, jan lupo dicoblos sambiang direkam di HP. Inyo ko pemimpin perubahan, kok nyampang barubah gambarnyo pas dicoblos, jadi bisa tarekam. Nan kaduo, harus siap-siap pai ka Jakarta, ikuik menggemis anggaran ka Jakarta. Nan alun pernah ka Jakarta, iyo sanang. Tapi alun tantu ongkoih dari sianyo lai. Sagitu sajo info bagalau dulu. Cusss", si buyuang siap mamposting statusnyo. Klik

Alah 15 minik ndak ado nan komen doh. Kato si buyuang dalam hati, iyo barek syarat mancucuak apak ko mah

 

Karya : Ronny P Sasmita